Jöklarannsóknafélag Íslands Iceland Glaciological Society

4 weeks ago

Vorferð JÖRFÍ 2025

Vorferð Jöklarannsóknafélags Íslands 2025 fór fram við góðar aðstæður og í þetta sinn þurfti ekki að hliðra brottfarardegi vegna veðurs. Ferðin hófst þann 29. maí og stóð yfir í átta daga með fjölbreyttum verkefnum og góðum hópi þátttakenda. Lagt var upp á Vatnajökul um Skálafellsjökul og förinni heitið á Grímsfjall.

Í ferðinni voru framkvæmdar íssjár- og gasmælingar, veðurstöðvar, skjálftamælar og GPS-tæki voru þjónustuð, og gerðar þyngdarmælingar. Boraðar voru afkomuholur og í Grímsvötnum sáust greinileg ummerki eftir nýlegt jökulhlaup. Í fyrsta sinn voru gasmælingar við gömlu gosstöðvarnar í suðvesturhluta Grímsvatna gerðar með dróna.

Í Kverkfjöllum var nýr kamar settur upp við skálann og unnið að viðhaldi á skála, auk bergsýnatöku á nærliggjandi svæðum. Vatnshæð lónsins í Kverkfjöllum var mæld og nýttu nokkrir galvaskir ferðalangar tækifærið og böðuðu sig í lóninu. Í ferðinni voru einnig tekin sýni á Pálsfjalli, Húsbónda, Hamrinum, Kistu og í Esju og settur niður nýr hitastrengur á Tungnaárjökli sem mælir hitasnið í snjó og ís.
Veðrið lék við hópinn fyrstu daga ferðarinnar en þegar leið á ferðina fór að hvessa verulega.

Á sjötta degi þurfti að halda sig innan dyra vegna gulra og appelsínugulra viðvarana, en ferðalangar nýttu tímann til frekara undirbúnings fyrir heimferð og vinnu við skála á Grímsfjalli. Að lokum gafst færi á að snúa til baka þann 5. júní, færið af jöklinum var frekar þungt en allir skiluðu sér heilir heim að lokum.

Ferðin gekk afar vel, verkefnin voru fjölbreytt og hópurinn samstilltur. Þrátt fyrir tveggja daga inniveru var stemningin góð – enda lauk ferðinni með grilluðu lambalæri, veislu í skálanum og dansi langt fram á nótt. Með í för var einnig hópur sem vinnur að heimildamynd um ferðina, sem verður kynnt á haustmánuðum og veitir innsýn í þetta einstaka jöklaævintýri. ... See MoreSee Less

+

Jöklarannsóknafélag Íslands Iceland Glaciological Society

2 months ago

Afkomuferð á Mýrdalsjökul – vor 2025

Laugardaginn 17. maí brá rúmlega 30 manna hópur Jöklarannsóknafélags Íslands sér á Mýrdalsjökul til að mæla vetrarafkomu jökulsins. Hópurinn var að vanda fjölbreyttur, vísindafólk, almennir félagar, ungir sem aldnir, en einnig komu fréttamenn frá Ríkisútvarpinu með í ferðina. Leiðangurinn lagði snemma af stað úr Reykjavík, ók upp að Sólheimahjáleigu og þaðan að jökulrönd og loks upp á jökul.

Veðrið var einfaldlega fullkomið – logn, heiðskýrt og sól eins langt og augað eygði, veður sem fæstir muna að hafa upplifað á jöklinum! Ferðamátinn var fjölbreyttur, bílar, vélsleðar, skíði og stigasleðar voru í boði og fluttu fólk og búnað um jökulinn. Hópurinn fór á Austmannbungu þar sem sjá mátti ketilinn sem hljóp úr í Skálm/Leirá í fyrra.

Í þessari blíðu tókst að bora þrjár 7–9 m djúpar afkomuholur þrátt fyrir smá þunga í snjónum eftir hlýindi maí mánaðar. Að borverki loknu voru grillaðar pulsur á Goðabungu. Ferðalangar komu niður af jöklinum um kvöldmatarleyti, skelltu sér í vel verðskuldaðan ís á Hvolsvelli og héldu svo til baka til Reykjavíkur.

Fyrstu niðurstöður benda til þess að vetrarafkoman hafi verið undir meðaltali, það er minna snjóaði á jökulinn í vetur en síðustu ár. Það er í góðu samræmi við athuganir á öðrum helstu jöklum landsins, en búið er að gera afkomumælingar á Langjökli, Hofsjökli, Vatnajökli, Eyjafjallajökli, Þrándarjökli og Hofsjökli Eystri.

Eins og oft áður er betra að láta myndirnar tala sínu máli!

Hér má einnig sjá frétt RÚV um ferðina en fréttamenn slógust í för með hópnum.
www.ruv.is/frettir/innlent/2025-05-18-borad-i-jokul-sem-minnkar-um-metra-a-ari-444187?fbclid=IwY2... ... See MoreSee Less

+