Yfirlit yfir fréttir og færslur skrifaðar á vef félagsins

Nothing Found

Sorry, no posts matched your criteria

Pétur Þorleifsson, heiðursfélagi JÖRFÍ, 2. júlí 1933 – 6. janúar 2021

Mánudaginn 25. janúar, voru borin til grafar hjónin Guðbjörg Jóna Hjálmarsdóttir og Pétur Þorleifsson.  Pétur var fjalla- og jöklamaður og heiðursfélagi í Jöklarannsóknafélaginu.  Þau létust með 10 daga millibili en bæði áttu við vanheilsu að stríða síðustu misserin.  Pétur var fæddur 1933 og því á 88. aldursári þegar hann lést.  Hann var allra manna víðförlastur og fróðastur þegar kom að íslenskum fjöllum og skrifaði m.a. tvær vinsælar bækur um gönguleiðir á fjöll, aðra í samvinnu við Ara Trausta Guðmundsson.  Pétur fór margar jöklaferðir, gekk á skíðum um jökla, ferðaðist lengi á vélsleðum og átti hlut í snjóbíl á 7. áratug síðustu aldar.  Pétur sat um tíma í stjórn félagsins, beitti sér fyrir byggingu fjallaskála á háfjöllum og átti stærstan þátt í að velja skálum félagsins við Fjallkirkju í Langjökli og á Goðahnjúkum austast á Vatnajökli stað.  Þessir skálar hafa aldrei verið fjölsóttir en skálastæðin eru einhver þau fallegustu sem um getur á Íslandi.  Pétur var gerður að heiðursfélaga í Jöklarannsóknafélaginu á sextíu ára afmæli þess árið 2010, fyrir mikið framlag sitt til jöklaferða og könnunar.    

Jöklarannsóknafélagið minnist Péturs með hlýhug og þakklæti fyrir vel unnin störf og mikilsvert framlag um áratugi. 

Myndirnar eru úr vorferðinni 2004. Stóra myndin sýnir Pétur, sólbrunninn en glaðan í bragði í Jökulheimum í lok ferðar. Á efri myndinni til hægri er hann að koma upp á Hvannadalshnjúk. Neðri myndin er tekin á Jörfa, hæsta tindi Kverkfjalla. Pétur er lengst til vinstri. Honum á hægri hönd eru Guðrún Thorstensen, Magnús Hallgrímsson, Hlíf Ólafsdóttir, Leifur Jónsson og Inga Árnadóttir.

Fyrirlestur Sigrúnar Helgadóttur þriðjudaginn 12.1.2021

Fjarfundur JÖRFÍ þriðjudag 12. janúar kl. 20-21
Sigrún Helgadóttir – fyrirlestur JÖRFÍ:  Sigurður Þórarinsson, fyrstu ferðir hans á jökla.
Hér er hlekkur á fundinn, hann opnast kl. 19:45: https://eu01web.zoom.us/j/68720181437

Ágrip fyrirlestursins: Sigurður Þórarinsson, fyrstu ferðir hans á jökla.

Störf Sigurðar fyrir Jöklarannsóknafélagið þarf vart að kynna félögum þess. Hann sat í stjórn félagsins í 30 ár, leiðangursstjóri margra ferða á jökla og var ritstjóri Jökuls í áratugi. Hann varð formaður félagsins 1969 og gengdi því starfi til dauðadags í febrúar 1983. Allt þetta og svo miklu meira þekkja margir félagar í Jöklarannsóknafélaginu, þekkja til rannsókna hans, kunna ótal sögur af Sigurði og muna margir skemmtilegheit hans og snilli.

En hvenær kynntist Sigurður jöklum? Hvenær fór hann fyrst á jökul? Hvað gæti hafa kveikt þennan mikla áhuga hans á jöklum? Sigrún Helgadóttir hefur á síðustu árum skrifað ævisögu Sigurðar sem vonandi kemur út í tveim bindum síðar á þessu ári. Sigurður var fæddur 1912 og Sigrún mun rekja lítillega uppvöxt hans, æskuár og fyrstu ferðir um Ísland. Síðan fyrstu ferðir hans á jökla og loks ferðir og leiðangra sem hann fór um jökla áður en Jöklarannsóknafélagið var stofnað. Líka verða sýndar fjölmargar myndir frá þessum tíma, að mestu fengnar úr miklu myndasafni Sigurðar.

Flugbjörgunarsveitin í Reykjavík 70 ára

JÖRFÍ á sér jafnaldra þar sem er Flugbjörgunarsveitin í Reykjavík.  Sveitin var stofnuð í nóvember 1950, í kjölfar Geysisslyssins.  JÖRFÍ og FBS hafa löngum átt samleið og úr röðum sveitarinnar hafa komið margir þeirra sem unnið hafa mikið starf fyrir JÖRFÍ.  Félagið óskar Flugbjörgunarsveitinni til hamingju með tímamótin. 

Í tilefni af afmæli FBS varð til bókin Björgunarsveitin mín eftir Arngrím Hermannsson, þar sem eru teknar saman margar sögur af starfi og verkefnum sveitarinnar.  Bókina má kaupa í bókabúðum en hún er einnig til sölu úti í Flugbjörgunarsveit og verður það til áramóta.   Allur ágóði af sölu bókarinnar rennur til Flugbjörgunarsveitarinnar.Sjá nánar um bókina hér:  https://www.forlagid.is/vara/bjoergunarsveitin-min/

Stjórn JÖRFÍ