Streymt frá aðalfundi í kvöld.

Aðalfundur Jöklarannsóknafélags Íslands verður haldinn í kvöld, þriðjudaginn 22. febrúar 2022 kl. 20:00 í sal 132 í Öskju, Náttúrufræðahúsi Háskóla Íslands.

Streymt verður frá fundinum fyrir kaffihlé, en ekki verður hægt að greiða atkvæði. Hlekkur á streymið: „https://eu01web.zoom.us/j/65541794022„.

Að loknum hefðbundnum aðalfundarstörfum og kaffihléi verður sýnd heimildakvikmyndin, “Hinn stóri samhljómur sandsins“ sem lýsir hinni stórbrotnu náttúru Breiðamerkursands. Myndinni verður hins vegar ekki streymt. Gunnlaugur Þór Pálsson er leikstjóri en hann er einnig höfundur ásamt Þorvarði Árnasyni. Framleiðendur eru Sjónhending og Loftslagssjóður. Í myndinni eru m.a. notuð kort og þrívíddargögn frá Jarðvísindastofnun Háskólans, Vatnajökulsþjóðgarði og Veðurstofu Íslands. Umhverfis- og auðlindaráðuneytið og Loftslagssjóður styrktu gerð myndarinnar. Hægt er að sjá myndbrot úr hinum stóra samhljóm sandsins hér: „ https://vimeo.com/597439676„.

Aðalfundur JÖRFÍ annað kvöld, 22. feb.

Minnum á aðalfundinn annað kvöld, þriðjudaginn 22. febrúar. Sjá frétt hér að neðan.

Aðalfundur JÖRFÍ og nýtt fréttabréf

Aðalfundur Jöklarannsóknafélags Íslands verður haldinn þriðjudaginn 22. febrúar kl. 20:00, í Öskju, Náttúrufræðahúsi Háskóla Íslands.

Nánar um efni aðalfundarins í nýju fréttabréfi JÖRFÍ: „https://jorfi.is/wp-content/uploads/2022/02/151_2022-02.pdf„.

Fyrirlestrar annað kvöld um Grímsvatnahlaup og skjálftamælingar á Vatnajökli

Við minnum á fjarfundinn annað kvöld, miðvikudaginn 19. janúar, kl. 20 – 22.

Eyjólfur Magnússon mun segja frá Grímsvatnahlaupi sem varð í lok árs 2021 og Kristín Jónsdóttir ásamt Sölva Þrastarsyni segja frá óhefðbundnum jarðskjálftamælingum með ljósleiðara á Grímsfjalli. Í upphafi fundarins verður nýr vefur tímaritsins Jökuls formlega opnaður og virkni hans kynnt. Nánari upplýsingar eru í fyrri tilkynningu hér að neðan.

Fundinum verður einungis streymt á netinu, og hlekkurinn hér á eftir opnast stuttu fyrir fundinn: „https://eu01web.zoom.us/j/66705211352„. Hægt er að tengjast fundinum með Zoom hugbúnaði í t.d. síma eða tölvu.

Fræðsluerindi á fjarfundi og ný vefsíða Jökuls

Miðvikudaginn 19. janúar verður fyrsta fjar-fræðsluerindi JÖRFÍ þetta árið. Eyjólfur Magnússon mun segja frá Grímsvatnahlaupi sem varð í lok árs 2021 og Kristín Jónsdóttir ásamt Sölva Þrastarsyni segja frá óhefðbundnum jarðskjálftamælingum með ljósleiðara á Grímsfjalli. Í upphafi fundarins verður nýr vefur tímaritsins Jökuls formlega opnaður og virkni hans kynnt.

Grímsvatnahlaup á aðventunni 2021: Í nóvember 2021 hófst jökulhlaup úr Grímsvötnum. Þá hafði tæpur rúmkílómetri af bræðsluvatni safnast fyrir í vötnunum frá síðasta hlaupi sem var haustið 2018. Ekki hafði safnast eins mikið í vötnin í 25 ár, þ.e. síðan í Gjálpargosinu 1996. Aldrei hefur áður verið fylgst eins vel með gangi Grímsvatnahlaups. Vatnsborð Grímsvatna er vaktað í tveimur GPS stöðvum sem eru staðsettar í fljótandi íshellu Grímsvatna og voru í beinu fjarskiptasambandi þannig að mælingarnar bárust jafnóðum og þær voru skráðar. Út frá sighraða íshellunnar, sem mældur var með nákvæmni upp á 1-2 cm á dag, var hægt reikna hversu hratt rann úr vötnunum. Þessar mælingar sýna að úrrennsli vatnanna óx úr fáeinum m3/s um miðjan nóvember í ~3500 m3/s að kvöldi 4. desember, eftir það minnkaði rennslið hratt og 7. desember höfðu vötnin líklega tæmst. Í erindinu verður farið yfir þessar mælingar og aðrar sem aflað var í hlaupinu. Í erindu verður einnig verður farið yfir þær breytingar sem orðið hafa í Grímsvötnum frá Gjálpargosinu til dagsins í dag.

Eyjólfur Magnússon er vísindamaður í jöklafræði við Jarðvísindastofnun Háskólans

Ljósleiðaraverkefni á Grímsfjalli: Í maí 2021 var farinn rannsóknarleiðangur á Grímsfjall í óhefðbundnar jarðskjálftamælingar þar sem plægður var 12 km langur og 0,5 cm breiður ljósleiðarakapall, um 0,5 m ofan í snjóinn, frá Grímsfjalli og ofan í Grímsvötn. Að leiðangrinum stóðu vísindamenn frá ETH háskólanum í Sviss og Veðurstofu Íslands, með aðstoð Hjálparsveita skáta í Reykjavík og JÖRFÍ félaga. Síðastliðin ár hefur orðið bylting í jarðskjálftafræði þar sem sýnt hefur verið fram á hvernig nýta má ljósleiðara til að mæla jarðskjálfta í miklu hærri upplausn en áður. Aðferðin notar ljósleiðara ásamt sérútbúinni tölvu sem sendir laserpúlsa í gegnum ljósleiðara og nemur endurkast frá þeim. Í Grímsvatnaverkefninu, sem kallað hefur verið DAS-BúmmBúmm, voru gerðar mælingar á 8 m fresti í ljósleiðaranum, eða í heildina um 1550 mælingar (15 sinnum fleiri en allir jarðskjálftamælar á Íslandi!). Auk þess að mæla margfalt fleiri smáskjálfta en sjást í hefðbundnum mælingum, sýndi tilraunin t.a.m. samfelldan titring á þeim hluta ljósleiðarans sem lá ofan á íshellu Grímsvatna. Í fyrirlestrinum verður sagt frá leiðangrinum og fyrstu niðurstöðum gagnaúrvinnslunnar.

Kristín Jónsdóttir er jarðskjálftafræðingur og hópstjóri Náttúruvárvöktunar Veðurstofu Íslands og Sölvi Þrastarson er í doktorsnámi í jarðskjálftafræði við ETH í Zurich í Sviss.

Vísindatímaritið Jökull: Frá 1951 hafa birst yfir 400 ritrýndar vísindagreinar í Jökli. Ritið er því stærsta safn fræðigreina sem til er um jarðfræði Íslands og hefur mikla þýðingu fyrir jarðvísindi hér á landi. Undanfarið ár hefur verið unnið að því að koma Jökli í rafrænt form með þróun heimasíðu sem gerir notendum kleift að leita í greinasafninu eftir ýmsum leiðum.