Jöklar á Íslandi – Helgi Björnsson

joklar_hb

Í tilefni af nýútkominni bók Helga Björnssonar Jöklar á Íslandi munu Jöklarannsóknafélag Íslands og Hið íslenska náttúrufræðafélag standa að sameiginlegum fundi mánudaginn 30. nóvember. Þar mun Helgi Björnsson jöklafræðingur halda fyrirlestur undir yfirskriftinni Jöklar á Íslandi við upphaf 21. aldar og framtíðarhorfur. Fundurinn verður haldinn í Salnum í Kópavogi og hefst klukkan 17:15.

Bókin verður seld á staðnum og stendur félögum JÖRFÍ til boða með veglegum afslætti.

Árshátíð JÖRFÍ 14. nóvember í Þórsmörk

Árshátíð Jöklarannsóknafélagsins verður haldin í Básum á Goðalandi helgina 14.-15. nóvember næstkomandi. Lagt verður af stað frá Select við Vesturlandsveg á laugardagsmorgni á bílum félagsmanna JÖRFÍ. Einnig verður boðið upp á sætaferðir frá Stóru-Mörk kl. 17.

Dagskrá:
-Lagt af stað frá Select við Vesturlandsveg kl. 10 laugardaginn 14. nóvember
-Gönguferð um Goðaland undir leiðsögn Madame X eftir hádegi
-Hátíðarkvöldverður hefst með fordrykk klukkan 18:30

Matseðill
*Fordrykkur á fæti
*Forréttur – Taðreyktur öfuguggi á blínisbeði með styrjuhrognum
*Aðalréttur – Draumur útilegumannsins með salati að hætti Höllu
*Eftirréttur – Snjóhvít jöklamús á öðru glasi

Aðrir drykkir en fordrykkur eru á ábyrgð hvers og eins.

Að loknum kvöldverði verða kyrjuð jöklamannaljóð við viðeigandi undirleik, ísköld skemmtiatriði borin á borð, dufl og dans fram eftir kvöldi þar sem harmonikkustemmning verður í hávegum höfð. Líkur á óvæntum gestum!

Á sunnudegi verður lagt af stað úr Básum uppúr hádegi.

Miðaverð er 6.000 kr, innifalið er matur á laugardagskvöldi og gisting í Básum. Miðasala mun fara fram 9.-11. nóvember hjá eftirtöldum:

*Valdi rakari – Rakarastofunni Dalbraut 1
*Finnur Pálsson – Öskju
*Jósef Hólmjárn – Veðurstofunni, Bústaðavegi

Fyrirspurnum varðandi árshátíð er svarað á sumarferd@gmail.com og hjá Ágústi í síma 894-5257.

Skemmtinefndin

Haustfundur JÖRFÍ 20. október í Öskju

Haustfundur Jöklarannsóknafélags Íslands verður haldinn 20.október 2009 í Öskju, náttúrufræðahúsi Háskóla Íslands klukkan 20:00.

Erindi: “Áhrif vatns á hreyfingu jökla rannsökuð með gervitunglum.”
Eyjólfur Magnússon

Myndasýning: Brynjar Gunnarsson sýnir ljósmyndir úr vorferð 2008.

Nánar er fjallað um haustfundinn og fleira tengt starfsemi JÖRFÍ undanfarið í fréttabréfi sem nýverið kom út og má nálgast hér.

Mæliferð á Mýrdalsjökul

Þann 20. september verður farið og vitjað um mælistikur Jöklarannsóknafélagsins á Mýrdalsjökli. Þetta er stuttur dagstúr og farið verður á vélsleðum. Ferðin er opin áhugasömum sem eru vanir ferðalögum á jökli og mæta á eigin sleðum. Yfirmælingameistari er Eiríkur ungi (raflost hja hotmail.com).

Vinnuferð í Jökulheima 11. – 13. september

Hin árlega 13. septemberferð Jöklarannsóknarfélagsins í Jökulheima verður að þessu sinni helguð viðhaldi á skálum félagsins þar. Markmiðið er að taka skálana algjörlega í gegn að innan og strjúka þar út úr hverju skoti. Þá er einnig ráðgert að mála húsin að utan ef aðstæður leyfa í samvinnu við skálanefnd.
Verði verkefnaskortur seinnipart á laugardag er ráðgert að bregða gönguklossum á fætur og kanna Tröllagíga eða aðra áhugaverða staði í grenndinni.
Eftir lokafrágang á sunnudag verður haldin krókaleið heim, farið að Tröllinu og Hreysi við Tungnaá og upp á Snjóöldu ef útsýni verður gott. Seinnipartskaffi í Veiðivötnum áður en haldið verður heim.
Farið verður á einkabílum og er farlausum bent á að hafa samband við fararstjórann.

Brottför frá Select við Vesturlandsveg kl. 19.00 föstudaginn 11. september.

Fararstjóri verður Hlynur Skagfjörð Pálsson.
Skráning og nánari upplýsingar hjá Hlyn í síma 893-0336 eða á sumarferd@gmail.com.